Skip to main content

Turnier da notg 2018

Ils victurs 2018: «Tennisolides» tiels umens e «Las cucumeras» tier las damas (Foto: Danillo Giger)

Cun 31 annunzias han ils Desertina Bulls era uonn puspei saviu menar atras in grondius turnier da notg. Quel ha giu liug la sonda vargada. Endisch equipas da damas e 20 equipas d’umens han battiu inaga dapli pil buccal.

Tgei success ch’il turnier da notg ei per ils Desertina Bulls muossa la media da 30 equipas per turnier ils davos diesch onns. Cunzun tier las damas eis ei gartegiau da carmalar la giuventetgna uonn el center da sport e cultura a Mustér. Culla midada che las damas astgan dar cun treis enstagl da duas giugaduras licenziadas han las giuvnas dallas junioras sut 21 saviu perschuader meglier lur collegas da far cun.

Tut en tut ei il turnier gartegiaus bein e senza gronds incaps. Cura ch’il paun per ils hot dogs era cuortamein vendius ora ella bar, ha la cafeteria dil center saviu gidar ora ed aschia evitar ch’in dils participonts sto pitir fom denter ils giugs. Ina proposta creativa per migliurar la purschida dalla bar ha l’equipa da Ruschein giu quella sera. Damai ch’els eran tuts vida magliar ina banana ed el medem mument vida beiber in Red Bull, han els proponiu da metter quella combinaziun l’auter onn silla carta. Per in bien num procurran els era grad cun lur num d‘equipa «La Wucht».

Gudignau tier las damas ha l’equipa cul num «Cucumeras» e tiels umens ils «Tennisoldies». Ina historia speciala dil turnier da notg ha Flavio Schuoler, che ha giugau en gol tiels victurs, scret. El ha gudignau il turnier da notg ils davos treis onns en seria cun duas differentas equipas. Suenter il final ha el lu era buca schau prender la caschun da guder sia gervosa ella bar ord il buccal e festivar ses treis tetels.
Ensemen cun entgins hosps han ils commembers dils Desertina Bulls saviu serrar giu la notg ella bar, guder la cumpignia e rir surda las historias ch’il turnier da notg ed ils Desertina Bulls han scret ils davos onns. Sco gia menziunau all’entschatta, ina grondiusa sera.

Per ils Desertina Bulls, Flavio Steger