Skip to main content

News

In punct pils umens

Dumengia vargada, ils 01.03.2020 ha la sisavla e secund davosa runda da campiunadi menau la squadra dils umens dils Desertina Bulls a Herisau. Els han recaltgau in fetg impurtont punct e vegnan aschia da star vinavon avon il concurrent grischunes Flims-Trin Unihockey ella tabella.

UHC Desertina Bulls vs UHC Tuggen-Reichenburg 4:4

Egl emprem giug senumna igl adversari UHC T-R. Ils da Mustér anflan bein el giug ed gia suenter l’emprema minuta vegnan els da marcar igl emprem siet sil gol digl adversari, che vegn denton tschappaus dil goli. Il giug va cun biaras bunas acziuns vinavon, denton ein ils oldies da Tuggen quels che marcheschan igl emprem gol silla tabla d’annunzia. Suenter numerusas bialas cumbinaziuns reussescha finalmein Adrian Flepp sin pass da Gian Fankhauser igl emprem gol per sias colurs ed egalisescha il giug cun in «tunnel». Quella energia positiva nazzegia Adrian per lantschar cuort suenter Cedric Zanin, che marchescha cun in siet plazzau il 2:1 per ils Bulls ella 16-avla minuta. Quei plai denton buc agl adversari e lez egalisescha 77 secundas pli tard il giug. Aschia vai ella pausa.

Suenter pausa va il giug vinavon sco quei ch’el ha calau. Fetg uliv cun bunas caschuns sin omisduas varts. Duas da quellas nazzegia Tuggen per marcar gols, aschia ch’els meinan ella 28-avla minuta cun 4:2. Ils Bulls laien denton buc muentar da quei resultad e dattan vinavon conzentrau siu giug. Finalmein, ella 35-avla minuta, vegn LucaZanetti sin pass da Andreas Huonder da sittar cun in liung siet il 4:3. Quei dat aunc inagada ina buna tensiun al giug ed ils giuvens da Mustér metten tut sin ina carta. Els prendan ora ella 38.5-avla minuta il goli Fabio Deragisch, che ha mussau in fetg bien giug, per remplazzar el cun in sisavel giugadur. Cun lur formaziun da «powerplay» vegnan els da s’instalar bein ella mesadad digl adversari e laien circular la balla. Las secundas caminan en in hui. 59 secundas avon la sirena finala reusescha danovamein Luca Zanetti in gol sin pass da Gian Fankhauser. Il deliberont 4:4 stat sin la tabla dad annunzia, tgei che ei era il score final.

Suenter 40 minutas ed ina buna lutga vegnan ils puncts parti ed ils giuvens da Mustér astgen esser fetg cuntents da lur prestaziun.

UHC Desertina Bulls vs TSV Mörschwil Dragons 0:7

Per il secund giug han las forzas buc tunschiu ed il cletg buc pli vuliu esser silla vart dils Bulls. Els ston prender cun ina dira terrada, cun siat cunter gols, la via da casa. E quei senza haver saviu marcar in gol ord lur bunas caschuns ch’els han saviu crear en in fetg dir e maluliv giug.

En la tabella statten ils da Mustér el derby grischun vinavon avon il concurrent da Flem, denton mo pli cun in punct avantatg. Gia en duas jamnas, numnadamein ils 15.03.2020 vegn ei ella davosa runda da campiunadi, el davos giug dalla sesiun d’ils umens a dar il giug decisiv denter ils dus teams. Ei stat fetg interessant entochen la fin. 

Per ils Desertina Bulls: Andreas Huonder