Skip to main content

News

La balla ei buca ruclada per ils Desertina Bulls

La dumengia vargada ein las giuvnas da Mustèr serendidas per ils davos dus giugs da campiunadi a Zug. Las adversarias eran Floorball Riders e Piranha Academy da Cuera.

La devisa encunter las tiarzas dalla gruppa era da star compact defensiv e nazegiar nossa caschun cun cunter attacas.Quei ei era reussiu bein tochen tier la 15’avla minuta. Lu han las adversarias marcau ils emprems dus gols. Da pausa ha il trenader Silvan Giger motivau las giuvnas e dau entgins inputs co vegnir tier schanzas per marcar igl emprem gol per ils Bulls. En la 27’avla minuta ha ei dau in culp liber per las giuvnas Sursilvanas. Sin aschia ina situaziun han ils Bulls trenau en ina speziala varianta. E promt funcziunescha la varianta studegiada en. Jana Caduff sietta igl emprem gol per ils Bulls sin pass dad Estella Mazzetta. Tuttas selegran, mo igl arbiter ei buca cuntents cul schabegiau ed anulescha il gol. Tuts ein intec surstai da quella decisiun e negin sa proppi daco. Schizun las adversarias san bu capir che quei gol ei vegnius anulaus. Janu, ei va vinavon. Las Sursilvanas fan vinavon squetsch. Estella Mazzetta survegn in pass da Gada Cathomas dalla banda si, sietta in ferm siet sin gol. Tuttas selegran, finalmein ei la balla da gol en. Mo la legria varga immediat. Ina egliada sigl arbiter ed era quei gol vegn anulaus muort impediment dil goli. La balla era denton daditg sur la lingia avon ch’il goli dallas adversarias era vegnius impedius. Ei vul buca esser. Cun quellas duas decisiuns han las Sursilvanas da morder ditg, ein frustradas e piardan aschia il schlontsch chei havevan entschiet en la secunda mesadat. Las adversarias fan aunc 3 gols alla fin aschia ch’il giug va a piarder cun 0:5. L’altezia dil resultat reflectescha buca la prestaziun dallas giuvnas da Mustèr. Ellas havessan giu fadegiau in meglier resultat sil puppi. Sche quels dus gols havessan quintau fuss il giug tgunsch ius ora auter e buc aschi clar en favur per igl adversari.

Secund giug, secunda schanza. Igl adversari ordlunder da Cuera ei adina grev da schazegiar en cun tgei equippa ch’ei sepresentan. Inagada ein ellas in cader da varga 17 persunas e fermezia, inautraga plitost sil cnapp e buc aschi fermas. Il Bulls han giu cletg. Ellas sepresentan cun ina equippa mediocra. Las empremas 10 minutas stattan las Sursilvanas compact ella defensiun per spitgar giu e mira co Cuera agescha. Igl adversari ei buca segirs vid la balla e fan sbagls ed aschia aulzan ils Bulls la pressiun. Il giug ei cumplettamein en ils mauns dallas giuvnas da Mustér. En la 17' avla minuta san ils Bulls giugar en powerplay. Cun bunas cumbinaziuns vegnan ellas adina puspei avon il gol da Piranha. Il goli parescha denton finadin siet. Cuort avon che Cuera ei puspei cumplet aulzan las Sursilvanas il pugn en l'aria e selegran sigl emprem gol. Sco schon tier igl emprem giug ei il cletg buca quei di tier la equippa dalla Romontschia. La balla ha tuccau la petga, latta, petga e ruclada ord il gol enstagl dad ira sur la lingia. Suenter pausa va ei vinavon cul medem maletg. Ils Bulls domineschan las adversarias sin tuttas modas. Laian tier neginas caschuns da sitar gols per Cuera. En la 29’ avla minuta san las Sursilvanas dar en powerplay. Il system stat, la bala va bein en las retschas dils Bulls. In bien siet sin gol da Tamara Derungs parescha il goli da Cuera e lanzescha promt la cunter attaca. Las Sursilvanas ein orientadas memia fetg en la offensiva ed aschia reusescha ei da Piranha da sittar igl 1:0. Las Sursilvanas laian buca demotivar da quella acziun. Las davosas forzas vegnan rimnadas per saver gudignar quei giug. Tuttas motiveschan ina lautra, ina per tuttas – tuttas per ina ei la devisa. Las davosas duas minutas pren il trenader ora il goli e remplazescha lez cun ina sisavla giugadura. Ei porta tut nuot. Il davos ha il “Killerinstinkt” muncau en la offensiva ed era quei giug va a piarder cun il resultat final da 0:1.

Avon dus onns ei la giuvna equippa da junioras dad unihoc vegnida fundada. Per gronda part senza experientscha da dar campiunadis dad unihoc. Ina equippa che ha stuiu entscheiver en tier null e baghegiar si tec e tec. Questa sesiun ha la giuvna gruppa cun in fetg ferm spert d’equippa fatg in enorm svilup. Il niveau ei fetg ferms tier las giuvnas dad unihoc en Svizra aschia ch'igl ei  grev da saver da cun cun las fermas equippas che han las empremas equippas che dattan NLA ed NLB. Pia las meglieras ligias dad unihoc dalla Svizra. Biars giugs ein vegni spiars cnapp mo cun in gol differenza ed era encunter las fermas equippas en la gruppa ein ellas adina vegnidas da tener cun bein. Per che las giuvnas dalla Romontschia san semiserar vinavon cun las equippas dalla Svizra drovan ellas sustegn da novas giugaduras. Aschia han 3 trenaments d’emprova liug il mars per giuvnas dallas annadas 2005-2000 en il Center da sport a Mustér. Dapli informaziuns anfleis Vus sin la pagina dil club dad unihoc dils Desertina Bulls.

Desertina Bulls cun: Flavia Deplazes, Chanel Monn, Seraina Demont, Tamara Derungs, Fabiana Bearth, Mila Demont, Flavia Cabernard, Aviva Mazzetta, Ramona Simonet, Jana Caduff, Gada Cathomas, Estella Mazzetta, Aline Cajacob, Noemi Zanin

Per ils Desertina Bulls: Silvan Giger