Skip to main content

News

Munchentau la caschun da far bien in plaz ella tabella

Las giuvnas dalla U21 dil club dad unihoc ein serendidas la dumengia vargada ad Appenzell per recaltgar ulterius puncts e saver far bien in plaz en la tabella.

UHC Desertina Bulls vs. SU Mendrisiotto 0:1 (0:1)

Igl emprem giug han las giuvnas giugau encunter Mendrisio. La devisa era clara. Ei dat nuot auter che gudignar. Plein motivaziun han las Sursilvanas priu bein spert enta maun il giug e vuliu mussar presenza sin il plaz. Cun entginas bunas cumbinaziuns eis ei reussiu bunas schanzas per marcar ils emprems gols per las Sursilvanas. Il goli da Mendrisio ha denton teniu tut quels siets. Cuort avon pausa ha ina giugadura da Mendrisio memia bia plaz e sa aschia marcar il 0:1. La sirena tuna e las empremas 20 minutas ein vargadas. Suenter pausa aulzan ils Desertina Bulls il squetsch e promt fan las adversarias grobs sbagls. Ei suonda ina gronda schanza suenter l’autra. La bala vul denton buca ira en gol. En la 30’ avla minuta san las giuvnas da Mustér giugar 2 minutas en powerplay. La megliera caschun da sittar in gol ha denton Mendrisio. Mila Demont en gol pils Desertina Bulls parescha denton quella caschun e lanzescha immediat in’attacca cun in liung pass sur igl entir plaz. Era quellas duas minutas fineschan senza che la bala rocla en gol. 2 minutas avon la fin pren il trenader dils Bulls in time out e remplezzescha il goli cun ina sisavla giugadura. Las Sursilvanas fan pressiun sin las Tessinesas, mo ei porta tut nuot. Ei vul buc gartegiar da marcar in gol aschia ch’il resultat final stat tier quei 0:1 per las Tessinesas.

UHC Desertina Bulls vs. FB Uri 3:5 (0:1)

Tier il davos giug dil di spitgava igl adversari dad Uri.

Las giuvnas dad Uri han entschiet il giug sco sch’ei mass per veta e mort. Corporalmein in fetg agressiv giug ed aschia eran ils Desertina Bulls levet surstadas e surdumandas dil tempo e l’agressivadad digl adversari. Promt eis ei reussiu ad Uri da sittar il 0:1. Quei gol ha fatg vegnir neunavon las Sursilvanas. Era lezzas han entschiet a mussar ch’ellas teman buca da tener encunter e mussar tgei ch’ellas san. Cun ina ferma defensiva dils Bulls eis ei silsuenter buca reussiu pli ad Uri da vegnir tier novas caschuns avon pausa. Suenter pausa han ils Bulls alzau la corna ed empruau da marcar igl emprem gol. Las adversarias han denton saviu sittar il secund gol. Pauc impressiunadas han las giuvnas romontschas rispundiu ed aschia ha Milena Derungs saviu sittar igl emprem gol sin pass da sia sora Tamara Derungs. Il giug era lantschaus daniev. Cun tups sbagls han las Sursilvanas denton fatg grev la veta a sesezzas. Enteifer 5 minutas ha Uri saviu alzar sin 4:1. Il trenader Silvan Giger ha priu in time out e motivau danovamein sias giuvnas. Il time out ha purtau siu effect giavischau. En la 31’ avla minuta ha Milena Derungs saviu sittar siu secund gol sin pass da Fabiana Bearth. Grazia a Livia Cadruvi en gol pils Desertina Bulls che ha teniu cun fermas paradas ils Bulls el giug, viveva la speronza dad ir vinavon per puncts. Uss era la devisa da dumignar la bala avon gol digl adversari e sittar ord mintga posiziun per smaccar la bala sur la lingia. Mintga caschun che las giuvnas havevan sittavan ellas, e quei ord mintga posiziun. Ed ei ha purtau fretg. Aviva Mazzetta ha saviu sittar quater minutas avon la fin il tierz gol per la giuvna equippa da Mustér. Alla fin han las forzas e l’experientscha muncau per volver il giug ed ir sco victuras giu dil plaz, aschia ch’era quei giug va a piarder cun il resultat final da 3:5 en favur dad Uri.

Desertina Bulls cun:Mila Demont, Livia Cadruvi, Tamara Derungs, Fabiana Bearth, Sabrina Venzin, Noemi Zanin, Aviva Mazzetta, Milena Derungs, Flavia Deplazes, Estella Mazzetta, Ramona Simonet, Gada Cathomas, Chanel Monn, Ilu Demont

Per ils Desertina Bulls: Silvan Giger