Skip to main content

News

Emprems puncts egl onn niev

La dumengia vargada ein las giuvnas dalla U21 dil club dad unihoc serendidas a Mendrisio. Las giuvnas da Mustér han aunc negins puncts sin il conto questa sesiun. Las davosas 3 rundas ein ellas adina stadas cuort avon recaltgar ils emprems puncts. Ils giugs ein denton mintga ga vegni spiars mo cun in gol differenza en favur dallas adversarias. Aschia era ei mo ina caussa dil temps tochen ch'ils emprems puncts suondan.

 

Igl emprem giug han las giuvnas giugau encunter las secundas dalla tabella ch'ein ordeifer da Sogn Gagl. Las adversarias han immediat surpriu il commando en il giug. La balla circulava bein en las retschas dallas giuvnas da Wasa, denton eran las giuvnas Sursilvanas sepreparadas bein sin quei giug  ella defensiva e schevan tier fetg paucas caschuns da sittar sin il gol. Grazia era allas defensuras che han mussau egl entir giug ina grondiusa prestaziun e bloccau ina massa siets digl adversari. Ella 15avla minuta ha l'equipa da Wasa saviu marcar igl emprem gol. Las giuvnas da Mustèr han denton buca schau influenzar da quei. Cun entginas bunas schanzas havessen ellas giu la caschun da marcar il pari aunc avon pausa, la balla leva denton buca ira en gol. Suenter pausa ha ei giu num da star vinavon defensiv e nezegiar la caschun dad ira en la cunteroffensiva. Cun paradas miraculusas ha Mila Demont teniu sia equipa el giug e schau sperar ditg sigl emprem punct per las Sursilvanas. Suenter 33 minutas ha nies goli denton tuttina stuiu prender duas ga la balla ord igl agen gol. Ils Bulls han aun inaga alzau la pressiun sco era il tempo e promt ha Flavia Cabernard giu ina gronda caschun da sittar igl emprem gol per ils Desertina Bulls. Il goli ha denton teniu quei siet. Cuort avon la fin ha Tamara Derungs priu plein curascha la balla en las atgnas retschas, fatg in solo sur gl’entir plaz entochen ch'ella haveva mo pli il goli da Sogn Gagl avon ella. Cun ina parada miraculusa ha il goli aunc enzaco pescau ora quei siet, aschia ch'igl ei stau tier il resultat final da 0:3 per Waldkirch Sogn Gagl.

Suenter dus giugs pausa eran las giuvnas motivadas per il secund giug. Quella ga vegneva igl adversari da Zug. Las Sursilvanas han priu entamaun naven da l'emprema minuta il giug ed aschia ha Chanel Monn saviu marcar cun in bi siet egl anghel cuort igl 1:0. Uss era la devisa da tener vinavon ault il tempo e marcar ulteriurs gols per saver decider baul il giug. Quei plan ei denton buca ius si. Cuort suenter igl 1:0 pils Bulls ha Zug egualisau il giug. Gada Cathomas ha puspei menau las giuvnas da Mustér en avantatg cun il 2:1 sin pass da Jana Caduff. Era quei avantatg ha buca teniu ditg aschia che las equipas ein idas en la pausa cun in pari da 2:2. Da pausa han ils trenaders Alexandra Flepp e Silvan Giger aunc inaga motivau sias giuvnas e fatg clar ch’ei dat mo ina devisa, e gliez ei da gudignar quei giug. Era suenter pausa dominavan ils Bulls il giug. Cun bialas cumbinaziuns ein las giuvnas vegnidas da crear entginas schanzas claras per sittar gols e decider il giug. L’efficienza avon gol ei denton stada in grond manco dils Bulls en omisdus giugs. En la 29 avla minuta ha Jana Caduff saviu marcar il 3:2 per las Sursilvanas sin pass da Gada Cathomas. Zug ha empruau da reagar, denton ha Livia Cadruvi, en gol dallas giuvnas da Mustèr giu pauc plascher da quei e teniu cun grondiusas paradas il 3:2 per ils Bulls. En la 36avla minuta ha denton era nies goli giu negina schanza e stuiu prender la balla sur la lingia digl agen gol. Zug ha egualisau sin 3:3. Pauc impressiunadas da quei 3:3 ha cuort sisu Noemi Zanin saviu marcar il 4:3 ed aschia ha la giuvna equipa sursilvana gudignau fadegiau ils emprems puncts dalla sesiun.

Ussa ha la giuvna equipa romontscha peda da sepreparar sin la proxima runda che ha liug ils 16.02 ad Appenzell. La tendenza muossa ensi e cun quella equipa motivada e talentada schai aunc en dad ira per ulteriurs puncts. E tgisà, forsa aunc far bien in ni dus plaz en la tabella.

Desertina Bulls cun: Jana Caduff, Gada Cathomas, Ilu Demont, Tamara Derungs, Andrina Cathomen, Flavia Deplazes, Lea Cabernard, Flavia Cabernard, Sabrina Venzin, Estella Mazzetta, Chanel Monn, Mila Demont, Livia Cadruvi, Noemi Zanin, Aviva Mazzetta

Per ils Desertina Bulls: Silvan Giger