Skip to main content

News

Schengegiau impurtonts puncts

La dumengia, ils 19 da schaner serenda l‘equipa dalla quarta ligia umens a Mörschwill per prender part alla quarta runda dil campiunadi Svizzer. Sulet treis puncts ha la squadra realtgau ord las rundas vargas. La finamira ei da returnar cun silmeins ina victoria a casa.

UHC Desertina Bulls vs. TSV Fortitudo Gossau 3:5 (2:1)

Plein perschuasiun semetta l‘equipa sin in plaz nunusidau. Il plantschiu ei da lenn ed aschia cuora la balla pli spert che en halla a casa.
Il giug entscheiva uliv sin omisduas varts. Ella 9avla minuta gartega ei denton all’equipa da Gossau da marcar igl emprem gol. Suenter ina malruasseivladad avon igl agien gol, sieta igl adversari la balla nunspitgadamein sin il gol da Flavio Schuoler. Gia cuort suenter muossa la squadra ina ferma reacziun. Aschia sietta Yannick Flepp sin pass da Dario Schuoler igl emprem gol ella 13avla minuta. Il giug stat intensivs cun bunas acziuns da mintga vart. Cuort avon pausa, ella 19avla minuta, gudogna Dario Schuoler la balla ella mesadad digl adversari. Danilo Giger cuora visavi enviers il gol e survegn giest il pass. El sietta igl impurtont gol cuort avon pausa per ils Bulls.
Las cundiziuns da partenza per la secunda mesadad giogan ella cartas per ils giuvens da Mustér. Il tempo suenter pausa ei sperts. Gia ella 6avla minuta suenter pausa croda il tierz gol per ils Bulls. Suenter ina biala cumbinaziun en dus, e cun pass final da Severino Giger, sietta Adrian Flepp lur equipa en buna posiziun per la victoria. La devisa muonta uss da tegner tempo e schar cuorer la balla. Mo la situaziun mida bein spert. Ils adversaris da Gossau vegnan da marcar il 3:2 ed il 3:3 muort gravionds sbagls ella defensiva. Per la victoria sto l’equipa rescar dapli e cumbatter per mintga balla. Cun meter tut sin ina carta gioga adina ina certa resca cun. Ils adversaris da S. Gagl siettan il 3:4 tschun minutas avon la fin. L’equipa da Mustér emprova aunc dad i per il pari cun nezzegiar la tactica da 6vs5. Mo la sirena sgregna allura en favur da Gossau cura che la balla sgola en gol vit dil Bulls.
Las cundiziuns eran bunas per la victoria, mo l’equipa ei buca vegnida da defender lur gol avunda. Aschia ch’il resultat suenter 40 minutas ei 3:5 per TSV Fortitudo Gossau.

UHC Desertina Bulls vs. UH Appenzell II 2:7 (0:2)

Suenter varga duas uras pausa entscheiva il secund giug dil di. Ils adversaris vegnan quella ga digl Appenzell. Ina equipa cun anteriurs giugadurs da pli aultas ligias ein actualmein sil secund plaz dalla tabella. Gia ordavon ein ils giugadurs da Mustér pertscharts, ch‘il giug vegn buc sempels.
La partida entscheiva ed immediat ein ils Bulls sut pressiun. Aschia croda gia ella tiarza minuta igl emprem gol per ils Appenzelles. L‘emprema mesadad dominescha clar igl adversari il giug. Per gronda part defendan ils giuvens lur gol ell‘atgna mesadad dil plaz. Gartegia ei da cuorer viers il gol digl adversari, vegn l‘acziun bloccada ton pli spert dil rival da quest giug. Ei gartegia ad els da sittar in ulteriu gol, quei che munta era il resultat da pausa.
Il giug suenter pausa cumenza sco el ha calau. Quater minutas suenter l‘entschatta croda il tierz gol ella reit da Marco Manetsch. Il goli dils Bulls che muossa ina buna partida oz, mo vegn e bu da defender tut ils ferms e plazzai sietts dils Appenzelles. Quellas ga ch‘ei vegn malsegir avon il gol dils adversaris, gioga la squadra da Mustér ora cun conters. Ella 29avla minuta schabegia exact quei. Aschia vegn Kevin Zanin da meter Cedric Zanin en buna posiziun per gl‘emprem gol.
Cun in ferm siet en gol sietta el igl emprem gol pils Bulls. La risposta da UH Appenzell vegn gia ina minuta suenter cun il 1:4. Ils Bulls han aunc entginas reservas ed aunc buc serrau giu cun la partida. Mo 30 secundas suenter il gol dils adversaris sietta Severino Giger il 2:4. La squadra da Mustér muossa bien engaschi igl entir giug, mo entochen il davos maunca la experientscha encunter l‘equipa rutinada da Appenzell. Aschia crodan treis ulteriurs gols che ein nuot dapli che cosmetica silla tabla d‘avis. Il resultat ei pli clars che quei ch‘il giug ei la finfinala staus.

La proxima runda ha liug a Tuggen ella Riedlandhalle ils 16 da fevrer 2020.

Ils Desertina Bulls cun: Marco Manetsch, Flavio Schuoler, Gian Fankhauser, Adrian Flepp, Luca Zanetti, Andreas Huonder, Severino Giger, Yannick Flepp, Cedric Zanin,  Kevin Zanin, Silvan Decurtins, Danilo Giger, Dario Schuoler

Per ils Desertina Bulls
Adrian Flepp