Skip to main content

News

«INA PER TUTTAS, TUTTAS PER INA»

Suenter ina cuorta pausa d’unviern, cumenza la sesiun dil campiunadi Svizzer d’unihoc per las giuvnas dalla 2. ligia dil club d’unihoc Desertina Bulls. Suenter mo treis trenaments, ha l’equipa priu part alla 5avla runda e cumbattiu per puncts. Cun nova energia, cargada duront ils bials dis d’unviern , ein las giuvnas serendidas a Sargans en halla da gimnastica.

UHC Desertina Bulls vs. UHC Sarganserland 1:1 (1:1)

Per lur runda ein las giuvnas narras da purtar impurtonts puncts a casa. Era il trenader ha mess lur finamira da contonscher minimum dus puncts ord quels dus giugs. Gl’emprem adversari ei era l’equipa da casa.
Il giug entscheiva en favur dalla squadra dil Bulls cun biaras bunas acziuns. Aschia gartegia ei da Jessica Spescha da sittar ella tiarza minuta gl’emprem gol suenter ina rebattida dil goli da Sargans. L’entschatta ei gartegiada bein per las giuvnas encunter l’equipa da casa, che vegn sustegnida fermamein da lur aspectaturs. Ei cuozza la 7avla minuta nua ch’ei vegn stretg avon gol dils Bulls. In sbagl ella defensiva dat la caschun a Sargans da sittar igl 1:1.
Entochen la fin dalla mesadad resta il giug fetg ulivs. Ei croda negins ulteriurs gols e la tabla d’avis muossa in resultat, nua che tut ei aunc aviert.
La secunda mesadad entscheiva gia naven dall’entschatta cun bia tempo. Cun midada da tactica e bia pressiun gia avon il gol digl adversari, reussescha ei allas giuvnas da disturbar baul l’offensiva da Sargans. Mo era dalla vart dil Bulls gartegia ei all’equipa da casa da sittar entginas ga sin gol. Cun fulminontas paradas tegn il goli dils Bulls, Marina Bearth lur squadra el giug. Aschia sco ella tegn ils siets dallas giuvnas da Sargans, cumbattan las giugaduras sil plaz per la victoria.
Il giug resta fetg ulivs e spert entochen la fin. La sirena resuna suenter 40 minutas. La squadra da Mustér ha cumbatiu per puncts e fadegiau il bein maritau pari.

UHC Desertina Bulls vs. Rheintal Gators Widnau 2:2 (0:2)

Suenter cuorta regeneraziun spetga el davos giug dalla 5avla runda ils Rheintal Gators da Widnau sin l’equipa dills Bulls. La mesadad dalla finamira pintga era contonschida. Aschia stueva ei aunc gartegiar da far minimum in pari el secund giug dil di.
Il giug ha entschiet tut auter che bein per ils Bulls. Gia ella quarta minuta reussescha ei agl adversari da marcar igl 0:1. Quei muort in pass fatal silla palutta d’ina giuvna da Widnau. Las empremas 15 minutas dil giug ei l’equipa buca concentrada e malsegira en lur fa. Aschia sto Ursina Bearth pascar ella 10avla minuta il 0:2 ord igl agien gol. Suenter 20 minutas munta il resultat 0:2 en favur dils Gators.
Tschun minutas pausa. Mo 5 minutas per saver ruossar e semeter sin peis e muossar ina reacziun.
Cun alzada vusch, curaschus e intensiv discuors e cul clom: „INA PER TUTTAS, TUTTAS PER INA“ deliberescha il trenader lur taurs ora sil plaz per la secunda mesadad. Gia naven dall’entschatta vesan ins, ch’ina autra equipa ei sil plaz. Las giuvnas giogan ora bialas acziuns e mudregian fetg las adversarias da Widnau. Ella 26avla minuta tschappa Flavia Schnoz giu la balla agl adversari e cuora enviers gol. Cun in ferm siet gartegia ella il 1:2 per ils Bulls.
Uss cuora la balla intensiv e spert ellas retschas da Mustér. Gia tschun minutas pli tard sieta Flavia Schnoz sin pass da Jessica Spescha il secund gol ed il giug ei puspei aviarts. Las giuvnas ein murdidas e lessan ira cun ina victoria a casa. Ei reussescha aunc ina petga e bunas paradas da Ursina Bearth, mo il resultat final resta tier 2:2.
Adina ei ina victoria buca il pli necessari per in’equipa. Sche la motivaziun, igl engaschi e la fidonza in cun l’auter sustegn il spert d’equipa, sche san ins era valetar quei sco ina pintga victoria. Cun esser „ina per tuttas, e tuttas per ina“ vegn contonschiu alla liunga dapli.

In grond engraziel va ora als numerus aspectaturs ch’ein suandai l’equipa entochen a Sargans e sustegniu ellas. La proxima runda ha liug ils 09.02.2020 a Wald ZH.

Ils Desertina Bulls cun: Ramona Venzin, Selina Giger, Anna Quinter, Jessica Spescha, Flavia Schnoz, Alexandra Flepp, Livia Solér, Annalea Candinas, Aline Cajacob, Corina Venzin, Noemi Zanin, Gada Cathomas, Ursina Bearth, Marina Bearth, Aurelia Giger

Per ils Desertina Bulls
Adrian Flepp