Skip to main content

News

Umens cun duas terradas

Dumengia vergada, ils 27.10.19 era il destin per la secunda runda da campinadi dall‘equipa dils Desertina Bulls danovamein el cantun Sogn Gagl. Els han giugau ella halla da sport a Gossau ed ein buc vegni da rimnar ulteriurs puncts. Suenter la buna entschatta ella sesiun han ils da Mustér stuiu prender lur liung viadi anavos a casa cun duas terradas e senza puncts sut ils peis.

UHC Desertina Bulls vs UHC Herisau 3:4

Egl emprem giug senumna igl adversari Herisau. L`equipa che conta usittadamein ina canzun avon igl emprem bulli ha lu cuort suenter era dau en ils tuns sil plaz e bein gleiti saviu marcar igl emprem gol. Els ein pli engaschai e semetten atras meglier en ils cumbats sil plaz ed aschia schmarveglia ei buca, che la sirena suna cuort avon la pausa danovamein per els cun il 2:0. Adrian « Balzi » Flepp vegn denton mo ina minuta suenter il secund gol da Herisau da pigliar giu la balla suenter in mal gartigiau pass e sa suenter in cuort sprint marcar igl emprem gol per ils Bulls.

Aschia stat ei 2:1 da pausa e las duas equipas san seruausan per 5 minutas. Quei stretg resultad ord vesta dils Desertina Bulls ei cunzun dad engraziar allas numerusas e fetg bunas paradas da Fabio Deragisch, che gioga sia emprema partida oz.
La secunda mesadad entscheiva e quella gada marcan ils da Herisau suenter sulettamein 3 minutas in ulteriur gol. Ils Bulls vegnan entras quella partenza pli vivs e vegnan pli activs sil plaz. Suenter numerusas petgas e lattas reusescha ei finalmein a Severino Giger sin pass da Yannick Flepp da marcar il secund gol per sias colurs. Il plascher tegn denton mo cuort, suenter 29 minutas giugadas va Herisau danovamein en avantag. Danilo Giger plai quei denton insuma buc ed el nazegia in dils sulets buns conters per marcar il davos gol en quei giug. Aschia munta il resultad final 4:3 per Herisau ed ils blau-alvs ston sedar pitgai.

UHC Desertina Bulls vs TSV Mörschwil Dragons 2:5

El secund giug ha ei num: taur encunter dragun.
Quei giug ei resumaus spert. Sco la figura fabulusa cun sias grondas alas ei l’equipa da Mörschwil sgulada entuorn las ureglias als taurs che eran d’enflar pli stedi giun plaun che sin peis. La construcziun da giug era buc avon maun e sche, lu senza anim e creativitad. Il giug defensiv era per gronda part nunexact e memia plaun. Las bunas paradas dil goli Paulo Figueiredo han gidau da tener siu team el giug, denton sto el tochen la fin pescar la balla tschun gadas ord la atgna reit. Sulettamein ellas davosas diesch minutas dil giug vegnan ils Bulls da mussar enqual bunas cumbinaziuns e da schar ir spert la balla, aschia che Silvan Giger (pass da Severino Giger) e Dario Schuoler (pass da Adrian Flepp) vegnan da curregier il resultad sin 5:2.
La conclusiun da quella dumengia ei en emprema linga: Tener spert il giug, dar pli concenzius anavon la balla ed esser pli activs ella defensiva ed en secunda lingia, sch’ins vul gudignar stons ins era vuler ei!

Ussa ha la giuvna equipa peda in meins per trenar e semigliurar sin la proxima runda. Tier quella speziala 3. dumengia da giug spetga denter auter la squadra da Flem en in derbi-grischun sin els. Il giug vha liug dumengia, ils 24.11.2019 dallas 10.00 el Center da sport a Mustér. 

Per ils Desertina Bulls,
Andreas Huonder