Skip to main content

News

Bien engaschi, mo pauc effizienza

La dumengia vargada ha la secunda ligia dallas dunnas dils Desertina Bulls cumbatiu ella secunda runda dil campiunadi per puncts a Widnau.

UHC Desertina Bulls vs Rheintal Gators Widnau, 1:1

La gruppa da casa ei era ils emprems adversaris per l‘equipa da Mustér. Cun ina buna preparaziun ed in bien sentiment pil giug, seprepara l’equipa sil plaz. Sco ch’il giug ha entschiet, domineschan ils bulls il giug e procuran per entginas bunas schanzas. L’effizienza ei en aschia ina situaziun decisiva. Mo la balla rolla buc da gol en tier l’equipa da casa. Era grazia al goli Marina Bearth resta la vesta alva dils Bulls. Aschia ch’il resultat da pausa resta tier 0:0. Las giuvnas cun plein perschuasiun entscheiva la secunda mesadad sco l’emprema. Encunter il decurs dil giug gartegia ei all’equipa da casa da marcar gl’emprem gol dil giug. Silsuenter cumbatan las giuvnas da Mustér aunc pli fetg per la balla. Il giug vegn malruasseivels, intensivs ed intec grobs. Cun ina sperta acziun ed in siet a bass, gartegia Ramona Venzin il gol che munta igl equiliber ella 38avla minuta. Quei che resta sco resultat final per igl emprem giug.

UHC Desertina Bulls vs UHC Laupen ZH, 0:4

Ils adversaris dil secund giug han gudignau lur emprem giug suveren cun 7:2. Aschia che l‘equipa ei pinada sin in intensiv giug. Cun respect denton negina tema entscheiva il davos giug dil di dad oz. Il giug vegn spert intensivs culs corps ed bunas schanzas sin mintga vart dil plaz. Ella 17avla minuta gartegian las dunnas da Laupen la petga dil gol dils bulls. Mo suenter 20 minutas resuna il tgiern da pausa cun il resultat da 0:0. La partida ei entochen dacheu uliva per omisduas equipas. La secunda mesadad entscheiva encunter il giavisch dall’equipa da Mustér. Ils adversaris reuseschan igl emprem gol ella 32avla minuta. Las damas dils Bulls vegnan malsegiras e laian tier entgins sbagls ella defensiva. Plinavon survegnan las damas castitgs che meta ellas aunc dapli sut pressiun. Las adversarias marcheschan treis ulteriurs gol, quei che munta era il resultat final suenter 40 intensivas minutas.

Ina dumengia cun ina buna prestaziun che ha denton buc purtau il fretg maritau. Ils proxims giugs han liug ils 10 da november ella Sporthalle Wies a Heiden.

Ils Desertina bulls cun: Marina Bearth, Ursina Bearth, Alexandra Flepp, Selina Giger, Flavia Schnoz, Annalea Candinas, Jessica Spescha, Noemi Zanin, Aurelia Giger, Ramona Venzin, Corina Venzin, Aline Cajacob, Livia Soler

Per ils Desertina Bulls
Adrian Flepp