Skip to main content

News

Ina dumengia cun potenzial anavon

La dumengia vargada ha era igl emprem campiunadi dallas damas secunda ligia d‘unihoc Mustér entschiet. L‘emprema runda ha giu liug egl Appenzell. L‘equipa giuvna semuossa plein fidonza e motivaziun alla emprema runda da campiunadi.

UHC Desertina Bulls vs UHC Sarganserland 0:0

Emprem giug, emprema schanza per ira per in punct. Igl adversari senumna UHC Sarganserland. La tala equipa che vegn si dalla formaziun sut 21 onns. Il giug entscheiva en fetg uliv cun bunas acziuns da mintga vart. Beinspert pren la squadra dils Bulls sut controlla il giug e dominescha enviers ils adversaris. Pliras bunas acziuns succedan ord il giug. Spert semuossa, che la megliera giugadura dallas dunnas da Sargans ei il goli. Pli u meins mintga siet ch’ei vegnius sin gol, pareva la davosa giuvna digl adversari suveran. Aschia ch‘il resultat da pausa stat in 0:0. Suenter pausa ei il giug puspei staus ulivs sin mintga vart. Era bunas paradas dil goli Marina Bearth tegn ellas vinavon el giug. L’ura muossa las davosas diesch minutas. Ils Bulls muossan ina ferma fasa da pressiun cun bunas combinaziuns ed ferms siets sin gol digl adversari. Cun tutta perschuasiun e motivaziun prendan las damas danovamein las davosas minutas dil giug per ellas. Mo cura che la sirena dall’ura sesuna tras la halla, resta ei tier il pari egl emprem giug dalla nova sesiun d’unihoc 19/20 dallas damas dils Desertia Bulls.

UHC Desertina Bulls vs UHC Glarnerland/Weesen 3:6

Cunquei che la secunda ligia digl unihoc en Svizra vegn giugada en fuorma da turnier, spetgan duas uras pli tard las bein enconuschentas adversarias da Weesen. Uonn medemamein rinforzadas cun la squadra dalla Glaruna. Ils giugs stattan aunc oz bein en regurdientscha alla damas da Mustér. Sperts, intensivs, e per gronda part agressivs e stentus cul tgierp.

Las premisas eran pia dadas ed il giug saveva entscheiver. Beinspert ei semuossau, ch‘il giug vegn semaglionts dils giugs vargai. Ils adversaris fan gia naven dall’ entschatta gronda pressiun. Las empremas minutas vegnan las damas da tegner bein encunter. Suenter entginas minutas croda l’emprema balla en gol dils Bulls. ll giug ei vinavon intensivs e drova bia forza corporala. Ils Bulls fan entgins sbagls ed aschia nazzegian las damas da Glaruna lur situaziuns. Vinavon maunca l’effizienza ell’offensiva. Ei croda 4 ulteriurs gols ell’emprema mesadad ed aschia stat il resultat da pausa 0:4 per Glaruna.

Suenter midada da tactica e vinavon speronza en mintgina, semetta l’equipa sil plaz per la secunda mesadad dil secund giug. Las empremas diesch minutas resta il tempo, l’aggressivitad sco era pressiun el giug e silla vart dils bulls. Ella 12. avla minuta reussescha Alexandra Flepp igl emprem gol sin pass da Flavia Schnoz. La forza sco era la motivaziun retuorna ellas retschas dallas damas dils Desertina Bulls. Cuortas minutas suenter marchescha Flavia Schnoz cun in marcant e ferm siet il secund gol. Danovamein ei il plascher gronds e las damas cuoran perschuadiu enviers il gol dils adversaris. Sill’ura restan aunc treis minutas per reducir il resultat. Il tempo digl adversari ha buc schau suenter, mo la segirtad ei sminuida. Aschia vegn Alexandra Flepp da prender giu la balla sin in fatal sbagl digl adversari e cuorer sin gol. Cun in siet plazzau el cantun ault reussescha ella il 3:6. Il qual resta entochen la fin. In giug muossa il potenzial, denton era nua ch’ei drova aunc trenament per ils giugs che suondan. Proxim campiunadi ha liug ils 20 d’october 2019 a Widnau.

Desertina Bulls cun: Marina Bearth, Ursina Bearth, Alexandra Flepp, Selina Giger, Aurelia Giger, Ramona Venzin, Corina Venzin, Flavia Schnoz, Annalea Candinas, Jessica Spescha, Aline Cajacob, Anna Quinter, Livia Solér e Gada Cathomas

Per ils Desertina Bulls
Adrian Flepp