Skip to main content

News

Entschiet la sesiun cun ina victoria

La dumengia dils 22.09.19 ha l‘equipa dils umens dalla quarta ligia dils Desertina Bulls giu sia emprema runda da campiunadi a Bazenheid en il cantun Sogn Gagl. En igl emprem giug han els gest saviu perschuader cun in 5:4 encunter l’equipa da casa, Bazenheid/Toggenburg. Il secund giuc han els buca saviu nazegiar lur habilitads ed han spiars cun 5:1 encunter ils Fortitudos da Gossau.

In giug da gnarvas encunter l’equipa da casa
Las differenzas eran gia claras avon che igl arbiter dat liber la partida. Ils giugadurs da Bazenheid eran tuts gia in bien toc pli vegls che nossa squadra giuvna. Els parevan dat esser segirs da sia caussa ed han gia saviu rimnar bein enqual experientscha dapli che nus. Perquei era ei gia clar naven dalla entschatta : nus stuein dar in spert giug e nazegiar quei che nus essan giuvens e fit. Detg e fatg, nus havein dau in spert giug ed enteifer cuort temps ha Cedric Zanin marcau igl emprem gol sin pass da Kevin Zanin. Denton ei igl adversari vegnius da reagar spert ed egualisar la partida.

Bazenheid/Toggenburg fa pulit squetsch sin la defensiun dils Desertina Bulls denton vegnan els da nazegiar ora ils sbagls dils adversaris e far spertas attacas anavos, che portan bein enquala schanza e la balla rolla danovamein da gol en suenter ina biala combinaziun da Gian Fankhauser e Cedric Zanin. Denton vegnin nus puspei buca da tener ditg quei gol differenza aschia ch’igl adversari tucca era nies gol. Cuort avon pausa gartegia ei puspei da nazegiar ora in sbagl ella offensiva digl adversari. Suenter haver cattau la balla ell’atgna mesadat, cuora Adrian Flepp enviers gol e dat il pass silla paluta da Cedric Zanin, che cumplettescha direct siu „hattrick“ cun in ferm siet en gol.

Da pausa vegn ei discussionau tgei ch’ei stau bien e tgei ch’ei stau meins bien. En la secunda mesadat senta igl adversari ch’ils arbiters ein buca memia segirs ed entscheiven a dar pli grob, aschia ch’ei dat duas levas blessuras tier l’equipa da Mustér. Vinavon vegn la squadra da casa danovamein d’egualisar il giuc. Cuort suenter ei il cletg sila vart da Yannick Flepp, che vegn da surmentar il goli digl adversari cun in bi siet da distanza. Vid la preit stat quei 4:3 screts ditg, tochen ch’igl adversari pren ora il goli e gioga cun in giugadur dapli sil platz. L’equipa da sisum la Surselva tegn denton defensiv suveran ed aschia ha Luca Zanetti marcau il 5-avel gol cun in siet el gol vit. Il giug ei staus plein tensiun entochen ils davos. Cun pressiun ei il capogruppa dalla sesiun vargada vegnius da marcar il quart gol ellas davosas duas secundas. Mo alla fin steva ei 5:4 per la giuvna equipa dils Desertina Bulls.

Pli pauc tempo e pli pauca prezisiun

En il secund giuc encunter ils Fortidudo Gossau era ei buc en ton tempo. Quei ei vegniu nazegiau ora ella secunda minuta. Severino Giger tucca il gol grazia a siu congiugadur che prendeva la vesida dil goli. Deton pli ditg ch’il giuc mava e pli mal exact che nus devan. Aschia han ils da Gossau saviu nazegiar cunterattacas e far treis gols entochen pausa. Schebein ch’igl adversari fageva pauc squetsch, ein ils Bulls buca vegnir da meter entuorn sia tactica. Plinavon havevan ils adversaris bia plaz avon il gol dils Desertina Bulls. Suenter pausa cun entginas forzas dapli, han ils Bulls tigniu cun e era vegnir tier lur siets sin gol digl adversari. Mo la balla leva buc anflar la via da gol en. Suenter tut quei, ha l‘equipa survegniu in castitg da duas minutas. «Sch’ins fa buca ils gols sche survegnan ins els», e quei ei era stau aschia. Igl adversari tucca duas ulteriuras gadas il gol dils Desertina Bulls e la partida va a fin cun ina terrada da 5:1 per la giuvna equipa da Mustér.

Aschia ein ils Desertina Bulls ira a casa cun ils emprems dus puncts, grazia a dus ferms golis giuvens cun pauca experientscha en quella ligia. Era sche ina ni l’autra ferma petga en l‘equipa ha muncau, quei di ein era ils giuvens vegni da perschuader cun in bien tempo ed il spért d’equippa ha constau.

Desertina Bulls cun: Paulo Figueiredo, Marco Manetsch, Severino Giger, Adrian Flepp, Livio Cajochen, Danilo Giger, Luca Zanetti, Yannick Flepp, Kevin Zanin, Cedric Zanin, Gian Fankhauser, Silvan Decurtins, Beat Simonet

Per ils Desertina Bulls, Danilo Giger