Skip to main content

News

Finiziun dalla sesiun cun ina clara victoria

La dumengia vargada ha la davosa runda dalla sesiun 16/17 per ils umens dals Desertina Bulls giu liug el center da sport e cultura a Mustér. Sut in grond diember dad aspectaturs han ils giuvens da Mustér saviu demonstrar lur giug dad unihoc e saviu rimnar dus ulteriurs puncts cun ina clara victoria.

UHC Desertina Bulls – March-Höfe Altendorf 8:1 (5:0)

Egl emprem giug spetga la equippa da Altendorf sin ils Bulls. Il giuven team da Mustér ei plein motivaziun da saver giugar a casa avon ils agens fans ils davos giugs da questa sesiun. Plein oiforia entscheivan els la partida ed  ei semuassa ualti spert: quei ei il di dils Bulls! Els domineschan sin cumpletta lingia il giug ed igl adversari vegn buc a frida cun igl ault tempo ch’ils da Mustér metten avon. Numerusas bialas cumbinaziuns e sperts pass prezis portan ils Bulls spert en avantatg  ed era grazia dallas bunas paradas dil goli, Martin “Schwyti“ Schwyter meinan els alla pausa cun tschun a nulla. Il trenader, Florian Zanin ei fetg cuntents cun la prestaziun d’igl entir team e motivescha da vinavon schar ir spert la balla e nazegiar mintga caschun.Cun quels plaids els patratgs cuntinueschan ils Bulls la secunda mesadad ed ei va vinavon sco ella emprema. Cun spertas cumbinaziuns giogen els stuorns ils da Altendorf che survegnen ulterirs gols enotchen la fin. Suletamein in cuort mument da nunconcentraziun ella 26. minuta  porta il sulet gol als da March-Höfe. Quei muenta denton buca fetg la equippa da casa. Els ha demonstrau cun in 8:1 claramein las forzas ed il progress da questa sesiun

Gols: 5‘ Adrian Flepp 1:0, 8‘ Pascal Huonder (sin pass da Joey Manetsch) 2:0, 10‘ Severino Giger (Pascal Huonder) 3:0, 15‘ Andreas Huonder (Andri Nay) 4:0, 16‘ Cedric Zanin (Severino Giger) 5:0, 21‘ Sergio Sac (Adrian Flepp) 6:0, 25‘ Dario Schuoler 7:0, 26‘ Altendorf 7:1, 37‘ Adrian Flepp (Dario Schuoler) 8:1

UHC Desertina Bulls – Chur Unihockey 1:4 (1:1)

Sco secund e davos giug dat ei in derbi cun il club da Cuera. Ils unihockeyaners dalla capitala drovan exnum ina victoria encunter ils Bulls per saver vegnir sin in plaz da qualificaziun per la tiarza ligia. Cun il schlontsch e la motivaziun ord igl emprem giug emprovan ils da Mustér naturalamein da far grev la veta agl adversari. Quei gartegia fetg bein ad els! Els vegnan adina puspei da pigliar giu ils pass d’ils favorits e vegnan sez tier bunas caschuns e numerus siets sin gol. Aschia chei stat tier pausa pari, 1:1.

Il trenader fa atents ils giuvens Sursilvans da star vinavon datier dalla gleud ed empruar vinavon da schar roschar bein la balla e nazegiar las caschuns.
Empau ord forzas e buca pli 100% cheu cul tgau schabegian entginas hekticas szenas avon il gol dals Bulls ella secunda mesadad. Ord duas da quellas survegnan ils Bulls dus castitgs, che muntan mintgamai in surpli da giugadurs per duas minutas per il tema da Cuera. Gie, schizun in penalti survegn ils da Cuera schanghegia dals arbeiters! Denton tut gida nuat, il goli Flavio Schuoler tegn schuber sia kista cun fetg fermas parads e tegn ils Sursilvans vinavon el giug. Els emprovan vinavon tut, denton il cletg ha bandunau els. Il tenti ei en ed els gartegian treis gadas mo il fier dalla rama dal gol d’il team da Cuera. Lez perencunter vegnan dad alzar il tempo e creeschan treis bunas caschuns ch’els midan entuorn en gols. Aschia stat ei alla fin 4:1 encuter la equippa da casa.

Gols: 2‘ Cuera 0:1, 6‘ Yannick Flepp 1:1, 20’Cuera 1:2, 22‘ Cuera 1:3, 25‘ castitg encunter Mustér 1:3, 31‘ castitg + penalti encuter Mustér 1:3, 36‘ Cuera 1:4

Cun dus fetg buns giugs han ils Desertina Bulls saviu mussar il grond progress ch’els han fatg en questa sesiun ed astgan esser loschs sin lur prestaziun. Els termineschan sin in bien otgavel plaz ed han ussa fadigiau la pausa da stad.

Desertina Bulls: Martin Schwyter, Flavio Schuoler, Joey Manetsch, Angelo Vincenz, Severino Giger, Pascal Huonder, Andreas Huonder, Adrian Flepp, Dario Schuoler, Simon Decutins, Ursin Deflorin, Arno Pfister, Livio Cajochen, Andri Nay, Yannick Flepp, Sergio Sac, Cedric Zanin e Silvan Giger (senza Rico Bearth). Trenader: Florian Zanin

La sesiun 17/18 vegn ad entscheiver el decuors d’il setember e tochen lu astgan els aunc separtizipar  tier entginas occurenzas sco per exempel in turnier amicabel a Sementina, Ti ni  al “Schweizer Cup“ el decuors dal matg. Tier quellas occurenzas, tut ils giugs passai ed  era ulteriuras infos anfleis vus sila pagina d’internet: www.desertinabulls.ch

Nus lessan engraziar a tut nos fans che han susteniu nus ella sesiun e selegrein da puspei saver beneventar vus tier nossas novas rundas da casa. Hopp Bulls!