Skip to main content

News

Damas sequalificheschan pil turnier da promoziun

Da cuort han las damas dils Desertina Bulls terminau lur sesiun d’unihoc ella 2. ligia sil secund plaz ed ein aschia sequalificadas pil turnier da promoziun ella 1. ligia. Quei suenter ina sesiun turbulenta e strentga, denton cun biars bials muments. Ina cuorta resumaziun.

Cun gronda febra e plein motivaziun han massa giuvnas entschiet la sesiun d’unihoc tier ils Desertina Bulls il zercladur vargau. Cul diember da varga 30 giuvnas eis ei spert stau clar ch’il club d’unihoc detti cun duas equipas da damas la sesiun vegnenta. Aschia han ils Bulls manteniu l’equipa dalla 2. ligia per las damas “intec pli veglias” e fundau in’ulteriura equipa da plaz grond cun las damas “empau pli giuvnas”, numnadamein l’equipa che ha giugau ella categoria U21.

Suenter entginas jamans cun trenament da forza e cundiziun spitgava igl emprem punct culminont dalla sesiun, il camp da trenament a Tenero. Da grondas caliras han las equipas dils Desertina Bulls trenau duront treis dis el Tessin. Tuts ein curri ed han suau. Savens perquei ch’ei era stregn, magari denton era mo muort la calira. Sper ils trenaments han las equipas gudiu gest quei che fa aschia in event nundetg custeivels, numnadamein la buna cumpignia. Entras tut las bialas uras sper e sil plaz d’unihoc han ils Desertina Bulls saviu emplenir las battarias pils proxims trenaments e per la sesiun vegnenta.

Turnai el Grischun, nua che las hallas ein per regla percletg empau pli frestgas, han era las damas dalla 2. ligia cuntinuau pruamein culs trenaments mintgamai ils mardis e venderdis sera. Plein motivaziun ha l’equipa dils Bulls lura entschiet igl emprem campiunadi il settember cun ina victoria (6:1 encunter Schaan) ed in pari (2:2 encunter Wängi), aschia ch’il start ei gartegiaus nuota aschi mal. Gia suenter la secunda runda e duas ulteriuras victorias (7:0 Zürisse ed 1:0 Weesen) salidavan las damas digl emprem plaz en lur gruppa.

Igl interessant vid igl unihoc ei il fatg ch’in giug d’unihoc ei atgnamein fetg sempels e tuttina nunpusseivel cumplicaus. La balla sto en gol! Quei san gia ils pli pigns. Aschia manegiavan era ils trenaders savens cura ch’els prendevan il fleter e malegiavan plein premura las situaziuns da giug sin la tabla: “Igl ei gie aschi sempel!” En quei mument svanevan las enzennas da damonda els tgaus dallas damas. Silmeins per in cuort temps.

La tiarza runda han las damas astgau giugar a casa avon in grondius publicum. Deplorablamein ei igl emprem giug ius claramein dall’aua giu (1:6 encunter Widnau). Denton han las giuvnas dils Bulls mussau ina reacziun el secund giug ed aschia tuttina aunc schenghegiau enqual gol als aspectaturs ed aspectaturas (5:1 encunter Züri Oberland).
Treis ulterius puncts ein vegni vitier cuort suenter en la quarta runda da campiunadi (0:0 encunter Wängi e 4:2 encunter Bronschofen).

La sesiun s’avanzava e nos trenaders han sper massa damondas era stuiu anflar rispostas e sligiaziuns per ulteriuras sfidas. Entras blessuras ein pliras giugaduras curdadas ora e nossa capo sietta gols Alexandra Flepp ha bandunau nus per passentar in miez onn ella Nova Zelanda. Aschia che las “pli veglias” damas dalla 2. ligia ein stadas ledas ed engrazieivlas che las “pli giuvnas” dalla U21 ein adina puspei seglidas en per sustener ellas duront trenaments e campiunadis. En quei liug in grond engraziament ad ellas.

Cun pli paucas giugaduras, denton buca pli pauc anim han las damas giugau vinavon e saviu recaltgar ella 5avla runda ils proxims dus puncts cun ina victoria da 4:2 encunter l’equipa da Schaan. El secund giug han las damas retratg lur secunda terrada dalla sesiun encunter Zürisee cun 2:5.

Duas rundas avon la finiziun era la situaziun al tgau dalla tabella fetg stretga. Da plaz in entochen quater era tut aunc pusseivel. L’equipa dils Bulls era da quei temps sin plaz treis cun tuttina biars puncts sco Weesen sil secund plaz. Gest quella equipa spitgava sco proxima sin nossas damas. En in giug fetg intensiv e cun ina prestaziun extraordinaria da mintga giugadura han las damas dils Bulls saviu ir suenter in 4:2 sco victuras giud il plaz. Animadas da quella victoria gudogna l’equipa da Mustér era il secund giug encuter Züri Oberland cun 2:0 ed ha aschia puspei saviu surprender il secund plaz ella gruppa dalla 2. ligia.

Avon la davosa runda da campiunadi ha ei giu num defender il secund plaz ella tabella. Cun ina victoria (4:0 encunter Bronschofen) ed ils proxims dus puncts ei quella finamira stada segirada gia suenter igl emprem giug da quella runda, aschia ch’il davos giug dalla sesiun encunter il victur dalla gruppa (0:2 encunter Widnau) ha giu negina influenza pli sin la tabella.

Las damas dils Desertina Bulls han la finala terminau la sesiun en la 2. ligia sil secund plaz. Cun quei plaz ein ellas sequalificadas pil turnier da promoziun en 1. ligia, il qual ha liug a Bronschofen la fin d’jamna dils 8 e 9 d’avrel.

Ei resta d’admetter in grond engraziament a tut quellas persunas che han possibilitau a nus tut quels bials muments sin e sper il plaz d’unihoc. In engraziel fetg a nos trenaders, ils fratelis Simon e Corsin Bisquolm ed al trenader dils golis Martin Schwyter, per tut il temps ch’els han investau e per lur grondiusa lavur. “Engraziel fetg” lein nus era dir a nos aspectaturs ed a nossas aspectaturas pil sustegn duront nos giugs, seigi quei stau a casa ni als giugs ordeiver. Vinavon engraziein nus als sponsurs ed a tut las ulteriuras persunas che sustegnan ils Desertina Bulls en ina moda ni l’autra.

Unihoc ei tuttina bia dapli che mo sittar la balla en gol.

Tabella 2. Ligia gruppa 4:
1. Rheintal Gators Widnau 26 puncts, 2. UHC Desertina Bulls Disentis 20, 3. UHC Weesen 18, 4. UHC Wängi 16, 5. Zürisee Unihockey ZKH 9, 6. UHC Schaan 9, 7. UHT H.S. Bronschofen 8, 8. Züri Oberland Pumas 6

Damas cun:
Alexandra Flepp, Aurelia Giger, Carla Nay, Carmen Wetzel, Andrea Giger, Flavia Schnoz, Marina Bearth, Marina Lombris, Ramona Venzin, Silvana Cabernard, Tamara Cavigelli, Ursina Bearth, Matilda Croy, Claudia Flury, Nadia Deflroin, Simon Bisquolm e Corsin Bisquolm

Per ils Bulls
Claudia Flury