Skip to main content

News

Victoria encunter il favorit dalla gruppa

Suenter il bien start ella nova sesiun cun 3 puncts eran ils giuvens Sursilvans motivai dad era recaltgar ulteriurs puncts ella secunda runda da campiunadi. Cun Herisau e Tuggen spitgavan dus fetg ferms adversaris.

UHC Desertina Bulls – UHC Herisau 2:3 (1:2)

Encunter igl adversari da Herisau havevan ils Desertina Bulls in’uliva bilanza. En dus giugs ha mintga squadra gudignau inagada. Aschia eran ils Sursilvans naven dall’entschatta dil giug motivai da midar quella bilanza sin lur vart.
Il giug ei naven dall’entschatta fetg ulivs ed omisduas equipas han bunas pusseivladads da marcar gols, mo ils dus golis pareschan tut ils siets ch’anflan la via sin gol. Suenter siat mintuas ein ils da Herisau che vegnan da marcar igl emprem gol dil giug. Ils Sursilvan restan denton vinavon activs ed emprovan cun tutta forza dad egalisar. Ella 11avla minuta dat ei in castitg da duas minutas encunter ils Desertina Bulls. Duront quellas duas minutas han denton ils Sursilvans la megliera pusseivladad da marcar gols. Dario Schuoler vegn lanschaus ord l’atgna defensiva cun in bi pass dad Ursin Deflorin. Persuls avon il goli gartegia ei denton buca ad el dad egalisar. Ella 17avla minutas dat ei in castitg da duas minutas encunter igl adversari ed aunc in penalti per ils Bulls. Era quella buna pusseivladad dad egalisar cun in penalti gartegia buca ad Angelo Vincenz. Ils Sursilvans han denton aunc la pusseivlad dad egalisar cun in um dapli sil plaz. Sin pass dil goli Sursilvan Flavio Schuoler gartegia ei al capitani Andreas Huonder finalmein dad egalisar cun in bi siet da distanza. Deplorablamein eis ei Herisau che vegn aunc da marcar lur secund gol trentas secundas avon pausa.
Ils Desertina Bulls entscheivan era la secunda mesadad fetg concentrau e cun bia squetsch sin il goli digl adversari. Ella 26avla minuta gartegia ei a Dario Schuoler d’egalisar suenter in bi pass liung ord la defensiun dad Ursin Deflorin. Il giug resta ulivs. Deplorablamein eis danovamein igl adversari che vegn dad ir cun in gol en avantatg. E quei cun in siet da distanza ch’in Sursilvan mida sa buca bloccar e mida aschia tupamein la direcziun sin gol. Tuttas stentas dad edalisar gidan nuot. Ils Desertina Bulls spiardan il giug encunter Herisau.
La victoria fuss stada pusseivla, sch’ils Sursilvans fussen stai pli freids avon gol digl adversari.

UHC Desertina Bulls – UHC Tuggen-Reichenburg 5:2 (3:1)

El secund giug dil di spetga cun Tugen-Reichenburg il victur dalla gruppa dalla sesiun vargada. Per els giugs da promoziun per la tiarza ligia han ei spiars ed aschia restai en quarta ligia. Aschia che la rolla da favorit era clar schon avon il giug.
Quella rolla da favorit semuossa lu suenter 30 secundas dil giug, nua ch’ei gartegia a Tuggen dad ir cun igl emprem siet sin gol en avantatg. Ils Desertina Bulls ein buca schoccai da quei e vegnan dad egalisar mo trenta secundas pli tard. In siet da Severino Giger vegn Cedric Zanin aunc da menar giu en gol. Il giug resta interessants perquei che omisudas equipas vulan marcar ulteriurs gols, mo ils dus golis e la buna lavur defensiva laian pil mument buca tier ulteriurs gols. Ella 11avla minuta eis ei lu puspei aschi lunsch. La balla va fetg bein ellas retschas dils Sursilvans ed aschia vegn Dario Schuoler, sin pass da Sergio Sac, da marcar il meritau 2:1. Il favorit vegn ussa empau nervus e survegn ella 17avla minuta in castitg da duas minutas. Quella invitaziun da marcar in ulteriur gol cun in um dapli sil plaz prendan ils Sursilvans bugen encunter. La balla circulescha fetg bein e spert ellas retschas dils Bulls. Suenter in siet da distanza da Severino Giger eis ei Livio Cajochen che sa dar avon gol la necessaria midada da direcziun e la balla croda en gol. Cun in meritau avantatg da 3:1 pils Desertina Bulls vegn iu ella pausa.
Suenter pausa surpren l’equipa da Tuggen il commando. La defensiun Sursilvan stat denton fetg bein e lai tier fetg paucs siets sin gol. Otg minutas va quei bein ella secunda mesadad, mo lu gartegia ei a Tuggen da scursanir il resultat sin 2:3. Laian ils Desertina Bulls ussa pender e piardan lur rythmus? Na! Mo ina minuta pli tard eis ei Andreas Huonder che vegn cun in bi siet da distanza da baghegiar ora il resultat sin 4:2 pils Bulls. Il adversari da Tuggen sto ussa arver pli fetg lur defensiva, quei che dat dapli plaz per ils Sursilvans. Quater minutas suenter il 4:2 nazzegia Yanick Flepp in da quels conters per marcar il 5:2 per ils Desertina Bulls. Quei ei la fin pigl adversari! Ellas davosas sis minutas dil giug han ei dapli la balla, mo vegnan buca pli malsegirs avon il goli Sursilvan Flavio Schuoler che muossa ina excellenta prestaziun. Cun ina buna lavura defensiva, in bien goli ed il saung freid avon il gol da Tuggen han ils Desertina Bulls gudignau quei giug meritadamein.

Cun dus ulteriurs puncts ein ils Desertina Bulls semess sin via a casa. Actualmein sesanflan ils Sursilvans sin plaz tschun ella tabella cun in punct pli pauc ch’il capo-gruppa. Quater dils tschun puncts ein vegni reclatgai en questa sesiun encunter las duas equipas che sesanflan sin paz 1 e 2 ella tabella. Lein sperar ch’ils Desertina Bulls vegnan era da mussar ella proxima runda da fin october aschia ina buna prestaziun cu ei va encunter Cuera e Dürnten, che han actualmein tuttina bia puncts sco ils Sursilvans.

Desertina Bulls: Flavio Schuoler, Andreas Huonder, Ursin Deflorin, Adrian Flepp, Sergio Sac, Dario Schuoler, Angelo Vincenz, Andri Nay, Severino Giger, Cedric Zanin, Yanick Flepp, Rico Bearth, Livio Cajochen. Senza: Simon Decurtins, Joey Manetsch e Arno Pfister.