Skip to main content

News

Sesiun per ils Desertina Bulls ha entschiet

Finalmein suenter in miez onn rolla il bal puspei en 4. Ligia tier ils umens dils Desertina Bulls. Suenter ina greva davosa sesiun ella nova gruppa, ein quei onn tut ils segns sin attacca. La lavur dils davos onns duei finalmein vegnir pagada anavos cun puncts. Quella sesiun astga in plaz sut ils emprems tschun esser la finamira.

L’emprema runda da campiunadi ha giu liug ad Altendorf sper il lag da Turitg. Ils adversaris eran Lokomotive Stäfa e la squadra da casa March-Höfe Altendorf. Cunzun Stäfa ha giugau la davosa sesiun fetg bein e terminau sil tierz plaz. Aschia eisi stau da quintar cun in grev cumbat per ils emprems puncts.

Stäfa e Mustér han entschiet en fetg controllau il giug e mes la prioritad sin la defensiun. Aschia ein ils golis vegnir mes sut pressiun da siets da distanza. Negin daquels han denton anflau lur destin ella reit. Stäfa ha sin quei alzau la pressiun ell’offensiva e quei sin donn a cuost da lur defensiva. Ed aschia ein conters dils Bulls vegnir pusseivels. Suenter ch’in pass da Stäfa ei vegniu interuts, ei Andri Nay sbrigaus anavon tochen avon gol e cun in pass travers sin Angelo Vincenz ei igl 1:0 staus realitad. Sin quei gol ha Stäfa mo treis minutas pli tard giu la endretga risposta. La defensiun dils Sursilvans ei per inagada buca stada consequenta avunda ed aschia ei in siet el cantun cuort staus da success. Il giug ei vegnius pli grobs ed ei ha dau plirs castitgs per omisduas squadras. Mo pli cun 4vs4 ha ei era dau dapli spazi e quei ha Andreas Huonder saviu nazegiar. Sin in pass da Ursin Deflorin ha el tirau ed traplau il goli da Stäfa. Quei 2:1 ha marcau l’entschatta dad ina malruasseivla fasa da finiziun. Stäfa ha smaccau sil pari, denton senza success. Igl emprem giug ha purtau l’impurtonta emprema victoria ella sesiun.

UHC Desertina Bulls – UHC Lokomotive Stäfa 2:1

L’ambiziun era uss clara. Mustér vuleva ir cun 4 puncts a casa. Mo era Altendorf vuleva muossar a casa avon lur aspectaturs siu inschign. Aschia ei il giug naven dall'entschatta staus bulaus d'in stretg cumbat. Omisduas squardas han dictau il tempo cun bialas cumbinaziuns ed aschia ei il giug vegnius intensivs e sperts. Adina puspei ein giugadurs vegni en bunas posiziuns per il siet final sin gol. Cunzun ils dus golis han stuiu mussar lur habilitads e biaras gadas spindrau en situaziuns malsegiras. Aschia ha ei buca surstau ch’in tric ha menau tier igl emprem gol. Yannick Flepp ha cuglianau l’entira defensiun e sbrigaus entuorn il gol e traplau il goli el cantun cuort. Igl adversari ei denton buca staus schocaus. Mo tschun minutas pli tard ei il giug puspei staus eguals. In siet din attacader da Altendorf ha, suenter sias numerusas paradas, passau il goli dils Bulls Flavio Schuoler.  Sin omisduas varts ha ei dau bunas schanzas ed era igl alumini ei staus entginas gadas el giug. Tuttina eis ei buca reussiu ad ina squadra da marcar il gol decisiv. Il pari ei staus meritaus per omisduas equipas.

UHC Desertina Bulls - UHC March Altendorf 1:1

Ils Sursilvans han recaltgau treis puncts alla runda da partenza ad Altendorf. Cun quei resultat san els esser cuntents. Denton sto l’equipa era migliurar entginas caussas per saver giugar l’entira sesiun cun quei success. La pusseivladat da muossar aunc inagada aschia ina prestaziun han els gia la proxima dumengia a Herisau.
Bulls cun: Flavio Schuoler (goli), Andreas Huonder, Rico Bearth, Arno Pfister, Andri Nay, Severino Giger, Joey Manetsch, Dario Schuoler, Sergio Sac, Cedric Zanin, Livio Cajochen, Adrian Flepp, Yannick Flepp, Simon Decurtins, Angelo Vincenz, Ursin Deflorin, Florian Zanin (trenader) e Martin Schwyter (trenader)

Per ils Desertina Bulls, Andri Nay