Skip to main content

News

Lantschau la nova sesiun cun duas victorias

Las damas dils Desertina Bulls han entschiet la sesiun d’unihoc 2017/18 ella 2. ligia la dumengia vargada a Kaltbrunn. Las adversarias dall’emprema runda eran cun Wängi e Schaan bein enconuschentas allas damas ord ils stretgs giugs dalla sesiun vargada.

UHC Desertina Bulls Disentis - UHC Wängi  9:0 (2:0)

Gols: 1:0 Alexandra Flepp (Carmen Wetzel), 2:0 Ramona Venzin (Corina Venzin), 3:0 Marina Lombris (Jessica Spescha), 4:0 Carla Flury (Claudia Flury), 5:0 Flavia Schnoz (Alexandra Flepp), 6:0 Carla Flury (Marina Lombris), 7:0 Corina Venzin (Flavia Schnoz), 8:0 Andrea Giger (Carla Flury), 9:0 Carla Flury (Anna Quinter)

Cun l’equipa da Wängi spitgava gia l’emprema sfida las giuvnas da Mustér. Duront las sesiuns vargadas eis ei numnadamai mai reussiu ad ellas da gudignar in giug encunter las damas dalla Turgovia. Ils giugs finevan savens cun in pari. Aschia ha ei giu num mussar presenza naven dall’entschatta. Ils trenaders Simon e Corsin Bisquolm han animau las giuvnas d’attaccar naven dall’entschatta e da metter entuorn quei che las damas han trenau duront ils davos meins da preparaziun. Las equipas paran ulivas ed il giug entscheiva a moda equilibrada. Ella 7avla minuta croda igl emprem gol pils Desertina Bulls. Alexandra Flepp sieta quel sin pass da Carmen Wetzel. Omisduas equipas fan vinavon squetsch. Ils Desertina Bulls vulan denton dapli. Ellas cuoran, cumbattan ed han success cun lur tactica. Ella 17avla minuta sieta Ramona Venzin il secund gol sin pass da Corina Venzin. Cul resultat da 2:0 van las equipas ella pausa. Ils trenaders ein cuntents culla prestaziun dallas giuvnas. Tuttina regordan els las giuvnas vid il giug dalla sesiun vargada encunter Wängi, nua che las damas menavan medemamein cun 2:0 suenter l’emprema mesadad e nua ch’ei era reussiu allas giuvnas dalla Turgovia da midar quel tier in 2:2 suenter la pausa. Perquei ha ei num d’attaccar vinavon consequentamein e dar a moda focusada. Ils plaids dils trenaders fan effect. Cuort suenter pausa sieta Marina Lombris il tierz gol sin pass da Jessica Spescha. Pauc temps pli tard gartegia ei a Carla Flury da marcar il quart gol en favur dils Desertina Bulls sin pass da Claudia Flury. Igl anim, il plascher vid il sport d’unihoc ed il ferm spért d’equipa dattan slontsch e las damas ein buca da frenar. Ellas cuoran, communicheschan, cumbineschan e quei cun success. El decuors dalla secunda mesadad reussescha ei a Flavia Schnoz, Corina Venzin, Andrea Giger ed duas ga Carla Flury da marcar tschun ulteriurs gols per ils Desertina Bulls. Aschia finescha igl emprem giug dalla sesiun 2017/18 cun in resultat da 9:0 en favur dallas damas da Mustér. Il start ei gartegiaus.

UHC Desertina Bulls Disentis - UHC Schaan  2:1 (0:1)

Gols: 1:1 Flavia Schnoz (Aurelia Giger), 2:1 Jessica Spescha (Carla Flury)

Il secund giug han las damas da Mustér giugau encunter Schaan. L’equipa da Schaan ha fatg squetsch naven dallas empremas secundas e las giuvnas da Mustèr parevan buca d’esser allertas e pinadas. Aschia sieta Schaan igl emprem gol gia suenter 20 secundas. Las giuvnas da Mustér rimnan aunc inagada tut las forzas ed emprovan da puspei giugar a moda offensiva e focusada. Omisduas equipas vegnan tier schanzas. En cumparegliaziun culla prestaziun dallas giuvnas da Mustér dil giug encunter Wängi muossan ellas ussa denton ina prestaziun mediocra cun enqual sbagl. Grazia alla buna prestaziun dil goli Ursina Bearth reussescha ei buca a Schaan d’alzar il resultat. Las damas han aunc entginas schanzas vegnan denton medamamein buca da marcar in gol en favur dils Desertina Bulls. Aschia van las equipas cun in resultat dad 1:0 per las giuvnas da Schaan ella pausa. Ils trenaders communicheschan allas damas nua ch’ellas ston luvrar. La communicaziun ed il moviment senza la balla mauncan. Las giuvnas vulan prender a casa quater puncts, mobiliseschan aunc inagada las davosas reservas ed emprovan da metter entuorn ils plaids dils trenaders. Ella 27avla minuta reussescha ei a Flavia Schnoz da marcar igl 1:1 sin pass d’Aurelia Giger. Ussa paran las giuvnas da Mustér d’esser sedestadadas. Ellas fan squetsch, communicheschan, cuoran e sietan. Cul pass da Carla Flury vegn Jessica Spescha da marcar il 2:1 per las giuvnas da Mustér duas minutas e miez avon la fin. Communablamein vegnan las damas da defender il resultat tochen alla fin. E sil pli tard ussa ei il start ella nova sesiun definitiv gartegiaus.
In engraziel a nos trenaders, aspectaturs e sponsurs. Nus selegrein sin ina buna sesiun 2017/18.

Damas cun:
Alexandra Flepp, Aurelia Giger, Carla Flury, Carmen Wetzel, Andrea Giger, Flavia Schnoz, Marina Lombris, Ramona Venzin, Jessica Spescha, Anna Quinter, Ursina Bearth, Corina Venzin, Claudia Flury, trenaders Simon Bisquolm e Corsin Bisquolm. (Muncau han Silvana Cabernard, Livia Solèr e Marina Bearth)