Skip to main content

Turnier da notg cun decoraziun da Nadal

Ils victurs 2017: «afraskai kuku» tiels umens e «Turboschnecken» tier las damas (Foto: Silvan Giger)

Uonn ha il turnier da notg, che ha gia dapi biars onns tradiziun tier ils Desertina Bulls, giu liug pli tard che usitau. Quei muort collisiuns da termins cul campiunadi Svizzer. Las annunzias pil turnier han denton buca pittiu sut il niev datum ed aschia han ils Bulls saviu beneventar perfin in’equipa dapli ch’egl onn 2016. 31 equipas (10 da damas e 21 d’umens) han battiu pil buccal quella sera.

Duront il turnier ha ei dau negins incaps ed era neginas blessuras pli grondas, quei ch’ei inaga dapli fetg legreivel pils organisaturs. Sil plaz vegnevi mintgamai battiu cun tutta forza. Aschi gleiti sco il giug era lu vargaus vegnevi dau ina paterlada e ris ensemen tier ina gervosa ella bar dil turnier. La tala era decorada sco usitau da Nadal cun in pigniel. Naturalmein ein las ruclas vegnidas remplazzadas cun ballas d’unihoc. Mo era ils arbiters han fatg ina biala pareta e purtau quella sera consequentamein capetschas da Sontgaclau per embellir quella occasiun. In ulteriur pigniel ha il stan da vendita da Menzli Sport survegniu sco decoraziun. Ils participonts han puspei giu la caschun d’empruar ora niev material e dar ina paterlada culs dus vendiders.

Ensesez levan ils Desertina Bulls porscher sper il turnier da damas ed umens als giugadurs pli vegls ina caschun da dar ella categoria da seniors. Damai ch’ei ha lu dau neginas annunzias per la tala, ei quei project vegnius strihaus. Insumma era la media da vegliadetgna uonn pli bassa ch’ils davos onns. La giuventetgna sut 20 onns ei uonn separticipada e ha buca schau prender da batter encunter las equipas che saudan tier igl inventar dil turnier.

Tier ils umens ha lu denton tuttina ina da quellas equipas ord igl inventar gudignau il turnier e saviu defender il tetel digl onn vargau - «afraskai kuku» cun giugadurs anteriurs dils Bulls da Rabius, Surrein, Trun e Mustér. Tier las damas ein aunc pli biaras equipas novas s’annunziadas. Quei ei tgunsch era in resultat dil success ch’ils Desertina Bulls han giu ils davos onns da recrutar giugaduras per l’equipa da junioras U21. Gudignau il turnier ha l’equipa cul num «Turboschnecken», cun giugaduras da Surrein, Mustér ed il goli da Sumvitg.

Viseta dil president communal

Suenter l’inauguraziun dalla nova halla enta Sedrun han entgins politichers locals, denter auter era il president da vischnaunca da Mustér, nazzegiau la caschun e fatg ina viseta al turnier da notg, quei che ha fatg grond plascher als organisaturs. El discuors han els manegiau che cunzun il diember d’equipas seigi impressiunond- che la giuventetgna locala metta sin peis aschia ina occasiun secapeschi buca da sesez e seigi ina fetg buna caussa per l’entira regiun.

Inaga dapli han tut ils commembers dils Desertina Bulls fatg grondiusa lavur ed aschia ei il turnier era uonn gartegiaus sco giavischau. In grond engraziel era a nos sponsurs per il sustegn.

Per ils Desertina Bulls, Flavio Steger