Skip to main content

In turnier da notg che ha fadigiau siu num

La sonda vargada ha il turnier da notg organisaus dils Desertina Bulls puspei giu liug el center da sport e cultura a Mustér. 28 equipas ein s’annunziadas, treis pli pauc ch’igl onn avon. Quella differenza ha ei adina puspei dau els davos onns. La constellaziun d’equipas ei uonn denton stada extraordinaria. Cun 14 equipas ha ei danovamein dau in record d’annunzias tier las damas. Cunzun las junioras sut 21 dils Desertina Bulls han procurau per biaras annunzias. Mo era in’equipa da giugaduras anteriuras ha puspei anflau sia via al turnier da notg. Quella mischeida da giuven e vegl fa schon dapi onns ora quella sera, era tier ils umens.

Inaga dapli ha ei dau negins incaps notabels ed aschia han ils organisaturs, ils participonts ed era ils aspectaturs saviu sedivertir grondiusamein. Cul diember uliv d’equipas ha il comité d’organisaziun saviu metter ensemen in plan da giug ideal. Mintg’equipa ha saviu giugar sis giugs ella prerunda. Las empremas duas equipas dalla gruppa ein sequalificadas directamein pils mezs finals e cun finals pigns e finals ei il turnier da notg vegnius serraus giu court avon las duas. Per honorar il grond diember d’equipas ei il final da damas staus uonn il punct final dil turnier.

Per la «notg» el turnier da notg han las damas e junioras dils Desertina Bulls baghegiau si puspei la bar cun gronda breigia. Ina buna part dils presents han lu era buca schau prender quella caschun e han dau ina paterlada duront ina gervosa ni ina ligiongia da piertg.

Gudignau il turnier han las medemas equipas sco igl onn vargau. Tier las damas «las cucumeras» e tier ils umens ils «Tennis Oldies». Tut en tut eis ei stau inaga dapli ina grondiusa sera ed in mussament, che quei turnier ha piars nuot da sia impurtonza pil club sco era per tut ils participonts.

Per ils Desertina Bulls,
Flavio Steger